2026ko abuztuaren 27an eta 28an, Euskal Fondoak Trifinio eskualdea ezagutzeko misioa egin zuen, Guatemala, Honduras eta El Salvadorrek partekatzen duten lurraldean. Misioa Río Lempa Mugaz Gaindiko Hiruko Mankomunitateko ordezkariek antolatu eta lagundu zuten.

Misioaren helburua eskualdeko baldintza sozial, ingurumeneko eta ekonomikoak lehen eskutik ezagutzea izan zen, baita basoen, uraren eta udal zerbitzu publikoen kudeaketaren alorretan lankidetza tekniko eta finantzarioko mekanismoak sustatzeko aukerak identifikatzea ere.

Bisita Euskal Fondoak Trifinio eskualdean bultzatutako “Betiko basoak” proiektuaren barruan kokatzen da. Proiektuak Lempa ibaiaren arro trinazionalaren gobernantza hidrikoari egindako ekarpena du ardatz, eta basoen kudeaketa jasangarria eta lurralde honetako uraren gobernantza indartzea du helburu.

Lurraldea eta haren lehentasunak ezagutzea

Bi egunetan zehar, ordezkaritzak Lurralde Gobernantzari, Uraren Segurtasunari, Basoen Kudeaketa Jasangarriari eta Klima Erresilientziari buruzko Foru Trinazionalean parte hartu zuen, 2026ko abuztuaren 27an, eta hainbat bilera egin zituen tokiko agintariekin, Mankomunitateko Zuzendaritza Batzordearekin eta parte hartzen duten udalerrietako Ingurumen Unitateekin.

Ibilbidean Esquipulas (Guatemala), Sinuapa eta Ocotepeque (Honduras) eta Chalatenango (El Salvador) bisitatu zituzten. Horrela, Euskal Fondoak udalerrien errealitateak, esperientziak eta lehentasunak gertutik ezagutzeko aukera izan zuen.

Foru Trinazionalak esperientziak eta proposamenak partekatzeko aukera eman zuen uraren segurtasunaren, basoen kudeaketa jasangarriaren eta klima-erresilientziaren inguruan. Halaber, gobernantza indartzearen eta lurraldeko eragileen arteko lana koordinatzearen garrantzia nabarmendu zen.

Euskal Fondoarentzat, misio hau aukera izan da “Betiko basoak” proiektua garatzen den testuingurua zuzenean ezagutzeko, lurraldeetatik planteatutako beharrak entzuteko eta tokiko erakundeekiko elkarrizketa indartzeko.

Informazio gehiago