Ordezkaritza honako hauek osatu dute: Morazán Norteko alkatea, Jaime Justino Vigil Hernández; Perquíngo (Morazán Norte) barrutiko zuzendaria, Aristides Omar Ramos Chicas; eta CECADE (Centro de Capacitación y Promoción de la Democracia) erakundeko aholkularia, David Alexis Rivas. Egonaldian zehar, lankidetza deszentralizatua eta nazioarteko elkartasuna indartzeko lan-agenda bat garatu dute.

Bilera instituzionala Euskal Fondoaren egoitzan

Lehen jardunaldian, ordezkaritza Euskal Fondoaren egoitzan hartu zuten. Bertan, lan-bilera bat egin zen martxan dauden proiektuen egoera partekatzeko, bereziki Morazan Norte udalerrian ura izateko eskubidearekin eta saneamenduarekin lotutako ekimenei dagokienez.

2004az geroztik, Euskal Fondoaren eta Morazan Norteko Udalaren arteko lankidetzari esker hainbat proiektu garatu dira ur-sistema integral bat eraikitzeko. Sistema horrek edateko ura hornitzeko azpiegiturak, saneamendua eta hondakin-uren tratamendua barne hartzen ditu, baita ondorengo kudeaketa, mantentze-lanak eta jasangarritasuna ere.

Une honetan martxan dauden ekimenen artean nabarmentzekoa da Soledad kantonerako edateko ura sartzeko proiektua (I. fasea), inguruko oinarrizko zerbitzuak indartzeko konpromisoaren baitan.

30 urte baino gehiagoko elkartasuna Segundo Montes komunitatearekin

Euskal Fondoak 30 urte baino gehiagoko harremana du Segundo Montes komunitatearekin. Komunitate hori 1980ko hamarkadako gatazka armatuaren garaian Hondurasen errefuxiatuta egon ondoren El Salvadorrera itzuli zen biztanleriaren kokaleku gisa sortu zen.

Denbora horretan, bertako biztanleek hainbat garapen-ekimen jaso dituzte, besteak beste oinarrizko azpiegiturak, hezkuntza eta kultura ekipamenduak eta etxebizitza programak sustatzeko proiektuen bidez.

Harreman horiek indartu egin dira Gipuzkoako Aiztondo bailarako hainbat udalerrirekin ezarritako senidetze loturen bidez. Horrela, elkarlan eredua sendotu da, herrien arteko elkartasunean, memoria historikoan eta tokiko garapen alternatibak elkarrekin eraikitzean oinarrituta.

Topaketa Aiztondo bailaran eta senidetze batzordea Zizurkilen

Bigarren jardunaldian, ordezkaritza Aiztondo bailarara joan zen. Bertan, lau udalerrik Morazángo komunitateekin senidetze harremanak dituzte.

Zizurkilen, senidetze batzordearen bilera egin zen bailarako lau alkateren parte-hartzearekin. Topaketa horrek truke instituzionalerako gune bat eskaini zuen, eta nazioarteko lankidetzarekiko konpromiso municipalista indartzeko balio izan zuen.

Eskubideetan oinarritutako lankidetza deszentralizatua

Misio instituzional honek lankidetza deszentralizatuaren dinamika indartzen du, zeinak erdigunean jartzen baititu oinarrizko zerbitzuetarako sarbidea, azpiegituren jasangarritasuna eta tokiko gaitasunen indartzea.

Aliantza horien bidez, Euskal Fondoak eta tokiko erakunde bazkideek lankidetza eraldatzaile baten aldeko apustua egiten jarraitzen dute, herrien arteko elkartasunean eta udalerrien arteko elkarrekiko laguntzan oinarrituta.