Lan-saioan, orain arte lortutako mugarri nagusiak partekatu ziren, eta lurraldean diharduten erakunde eta instituzioekin koordinazioa indartzeko aukera berriak identifikatu ziren, udal-esparrutik emakumeentzako arreta integraleko eredua sendotzeko helburuarekin.

Aurreikusitako jardueren artean, nabarmentzekoa da Guatemalako erakundeekin egingo den bideokonferentzia. Topaketa horren bidez, Emakumeentzako Diziplina Anitzeko Zentroen esperientzia eta funtzionamendua partekatuko dira, bi herrialdeen arteko ezagutza- eta jardunbide egokien trukea sustatzeko. Era berean, datozen hilabeteetan hainbat bisita egingo dira proiektuan parte hartzen duten udalerrietara, erakundeen arteko harremanak sendotzeko eta proiektuaren garapena bertatik bertara bultzatzen jarraitzeko.

Bilerak, halaber, erakunde bazkideek eta talde teknikoek egindako lana balioan jartzeko aukera eman zuen. Izan ere, udalerri bakoitzaren errealitatera egokitutako jarduerak garatzen ari dira, proiektua gauzatzean identifikatutako beharrei erantzuteko.

Jarraipen-prozesu honek parte hartzen duten erakundeen arteko koordinazioa hobetzen laguntzen du, eta esku-hartzearen hurrengo faseak planifikatzeko oinarriak sendotzen ditu. Topaketa honen bidez, Euskal Fondoak berretsi egin du udal-lankidetzaren aldeko konpromisoa, bidelaguntza, erakunde bazkideekin elkarlana eta tokiko gaitasunen indartzea oinarri dituen lankidetza sustatuz, emakumeen aurkako indarkeriaren prebentzioan eta emakumeen eskubideen bermean aurrera egiteko.

• Informazio gehiago